Kulturráđđi ásaha oastinortnega sámegielat girjjálašvuhtii
– Kulturráđđi lea guhká vuoruhan dán. Sámi girjjálašvuođasuorgi lea guhká vuordán ortnega, ja mii leat hui ilus go dat lea sajis. Dát lea dehálaš oassi Kulturráđi Duohtavuođa- ja soabahankommišuvnna raportta čuovvolanbarggus, dadjá Kulturráđi jođiheaddji Kristian Seltun.
Kulturráđđi lea sirdán ruđaid álggahit ortnega jagi 2026 rájes.
– Mii leat maid hui ilus dainna buriin gulahallamiin mii mis lea leamaš Sámedikkiin barggadettiin. Ovttasbargu surggiin lea dehálaš midjiide, lohká Seltun.
Dásseárvosaš eavttut sámegielgirjjálašvuođas ja dárogiel- girjjálašvuođas
Oastinortnet galgá sihkkarastit ahte ođđa sámegielat girjjálašvuohta mas lea alla kvalitehta, buvttaduvvo, almmuhuvvo, lávdejuvvo ja lohkkojuvvo. Dat galgá maid váikkuhit dasa ahte šaddá buoret ekonomalaš einnostahttivuohta girječálliide ja almmuheddjiide, ja eanet jorgaleapmi sámegielaid gaskkas, mii lea erenoamáš dehálaš unnimus sámegielaide.
- Sámiid bealis lea dát bargu bistán badjel 40 jagi. Dat ahte mii dál leat ožžon fásta ortnega lea dehálaš sihkkarastin dihte seamma eavttuid sámegielgirjjálašvuhtii go dárogielgirjjálašvuhtii, dadjá Sigbjørn Skåden, gii lea Kulturráđi miellahttu ja girjjálašvuođa fágalaš lávdegotti jođiheaddji.
- Dás lea stuorra mearkkašupmi sámi lohkkiide, girječálliide ja lágádusaide. Dat láhčá dili ahte eanet girječállit sáhttet čállit eanet girjjiid sámegillii, ja ahte lágádusat sáhttet vuoruhit ja almmuhit daid, dadjá Skåden.
Ortnet lea selektiiva oastinortnet ja guoská buot girjjálašvuođašáŋŋeriidda - čáppagirjjálašvuhtii, áššeprosai ja govvaráidduide - sihke rávisolbmuide, mánáide ja nuoraide. Dat galgá čuovvut seamma váldovuogádaga go Kulturráđi oastinortnegat muđui.
- Bargiidbellodat-ráđđehus áigu nannet sihke mánáid ja rávisolbmuid lohkama ja lohkanhálu, ja dalle lea maiddái dehálaš ahte olbmot galget sáhttit lohkat ja čállit sámegillii. Danne lea buorre oaidnit ahte Kulturráđđi čuovvula duohtavuođa- ja soabahanbarggu, ja vuoruha oažžut sadjái oastinortnega sámegielat girjjálašvuhtii dán jagi, lohká kultur- ja dásseárvoministtar Lubna Jaffery.
Kulturráđđi lea várren gávcci miljovnna ruvnnu ortnegii 2026:s. Dat lea doarvái dasa ahte ortnet galgá doaibmat bures álggu rájes, ja ahte sáhttá oastit ja sáddet viehka stuorra oasi sámegielgirjjiin girjerádjosiidda. Dat lea dattetge veahá unniduvvon veršuvdna dan ektui maid Kulturráđđi sávvá. Earret eará váilu vel fátmmastit sámegielgirjjiid mánáide ja nuoraide Kulturráđi skuvlagirjerájusortnegii. Kulturráđđi áigu áŋgiruššat oažžut dan sadjái boahtteáiggis.
Vuosttaš ohcanáigemearri lea čakčamánu 15. beaivvi
Ođđa ortnegis šaddá ohcanáigemearri guktii jagis, njukčamánu 15. b. ja čakčamánu 15. b. 2026:s lea dušše okta áigemearri, čakčamánus, ja dat guoská girjjiide main almmuhanbeaivi lea olles 2026:s. Buot almmuheaddjit main lea norgga organisašuvdnanummar sáhttet ohcat ja oažžut doarjaga gárvves buktagii, juogo deaddiluvvon girjái dahje digitála fiilii.
Loga eambbo ortnega birra ja oza dás arrow_forward
Háliida evttohusaid miellahtuide árvvoštallanlávdegoddái
Galgá nammaduvvot sierra árvvoštallanlávdegoddi dán ortnegii, ja don sáhtát dál evttohit miellahtuid lávdegoddái. Árvvoštallanlávdegoddi galgá lohkat ja árvvoštallat girjjiid mat dieđihuvvojit sámegielat girjjálašvuođa oastinortnegii, ja mearridit oastima.
Kulturráđđi háliida lávdegotti mas lea viiddis gelbbolašvuohta ja buorre ovddastus. Oppalaččat berre miellahtuin leat vásihus girječálli-, lágádus- ja girjerájussuorggis, dahje relevánta akademalaš duogáš. Lávdegottis galgá leat gelbbolašvuohta iešguđetge sámegielain, buot šáŋŋeriin ja girjjálašvuođas sihke rávisolbmuide, mánáide ja nuoraide. Lávdegotti miellahtut eai galgga ovddastit eará go iežaset, muhto galget dahkat sorjjasmeahttun árvvoštallamiid iežaset fágagelbbolašvuođa ja vásáhusaid vuođul. Kulturráđđi nammada miellahtuid guovtti jahkái háválassii.
Kulturráđđi háliida oažžut miellahttoevttohusaid miehtá Sámis. Sáhtát evttohit miellahtuid ovttaskas olmmožin dahje organisašuvnna bealis. Lea maiddái vejolaš evttohit iežas. Áigemearri sáddet evttohusaid lea čakčamánu 10. beaivvi.
Evttot miellahtuid dás arrow_outward
Loga eambbo Kulturráđi girjjálašvuođa oastinortnega birra
- Kulturráđđi oastá juohke jagi ođđa girjjiid mat juhkkojuvvojit Norgga girjerádjosiidda. Oastinortnegat váikkuhit ahte buvttaduvvo, almmuhuvvo, lohkkojuvvo ja gilvojuvvo girjjálašvuohta mas lea alla kvalitehta.
- Automáhtalaš oastinortnegat ostet buot girjjiid main árvvoštallojuvvo leat doarvái buorre girjjálaš kvalitehta, beroškeahttá bušeahtas.
- Selektiiva oastinortnegat ostet buoremus girjjiid, dađi mielde go lea bušeahtta.
