Vedtaksliste for søknader til 2. september 2021
Tilbake til 2021 (Alle)Om søknadsrunden
Ordninga skal bidra til å styrke produksjon av publikasjonar som presenterar og/eller analyserar aktuelle problemstillingar innan samtidskunst og kunstteori. Støtte vert gitt til fotobøker, monografiar, kunstnarbøker/artists’ books, utstillingskatalogar, bok- eller magasinseriar, fanziner, ulike hybridbøker. Manusutvikling til lengre tekstar om samtidskunst er ein viktig del av ordninga.
Talet på søknader: 41
Søknadssum: kr 5 476 303
Talet på tildelingar: 22
Vedtakssum: kr 1 973 000*
*Kr 1 500 000 frå stimuleringsmidlar
Det var 41 søknader til handsaming og grunna ekstra stimuleringmidlar kunne Fagleg utval for visuell kunst dele ut støtte til 22 bokprosjekt, som er ein tildelingsprosent på over 50. Dette er uvanleg; vanlegvis ligg tildelingsprosenten under 30 på denne ordninga. Søknadene er godt utvikla, verkar meir gjennomarbeidde og kvaliteten er høg på dei ulike bokprosjekta som er tildelt støtte.
Tendensar i søknadsmaterialet
Det var eit stort spenn i tildelingane i runden, både når det gjeld omfang og ambisjon, og tematikk.
Omfangsmessig hadde ein både ambisiøse og store prosjekt, til dei mindre, eksperimentelle publikasjonane. Sveinung Rudjord Unnelands «Tåkeklokkene» er eit døme på det siste. Boka vert den tredje i triologien METANOIA, og er som dei to føregåande bøkene, «Mørkningen» (2016) og «Hvorfor ryster eg» (2020), eit samarbeid med forfattar Andreas Vermehren Holm.
Kunstnarboka «Seldom States» av Samuel Brzeski nærmar seg lydkunstfeltet i form av hybrid-tekstar som responderer på rytme og sonisk vibrasjon. Bokprosjektet er utvikla i samband med eit gjesteopphald ved Lydgalleriet i Bergen.
Blant dei store prosjekta har ein fleire monografiar over avlidne eller tilårskomne nestorar på biletkunstfeltet. Skulptøren Knut Helge Odden gjekk bort i 2019 og boka «Mane» vil oppsummere og tematisere kunstnarlivet hans. Boka skal ferdigstillast til ei retrospektiv utstilling ved Telemark kunstsenter hausten 2022 og Hanne Grieg Hermansen og Øystein Wyller Odden publiserer på eige forlag. Aslak Gurholt får støtte til ein monografi over Paul Brand. I desse større prosjekta ser ein at bokformatet fungerer både som arkiv over og refleksjonsrom rundt den kunsten og dei diskursane som kunstnaren legg att etter seg.
Temaa i dei tilgodesette prosjekta spenner frå forgjengelegheit og nære relasjonar, til globale, politiske tematikkar som oljenæring i Noreg og i utlandet, og kunsten sin plass i diskusjonen rundt denne. Anne Szefer-Karlsens «Experiences of oil» er eit døme på eit prosjekt som tek opp tema rundt kunst, kunstnariske praksisar og infrastruktur for samtidskunst sett i samanheng med oljestatar og røynslar frå oljerike samfunn. I den andre enden av ein skala som går på det nære og private versus dei større, samfunnsmessige temaa har ein Mariken Kramers fotobok og kortprosasyklus «Jeg gjemmer meg i blomsten», som omhandlar det forgjengelege. I tillegg til Kramers prosjekt vart tre andre fotobøker gitt støtte.
Teoretisering og eigenrefleksjon har vore ei mangelvare i kunsthandverksfeltet. Ein større katalog kalla «Afterglow – new nordic porcelain» set fokus på nordisk porselen, der kunstnar-workshops dannar fundamentet for vandreutstillingar i Norden, vil kanskje bøte på dette. I boka vert òg historia til nedlagde porselesverkstader og -fabrikkar henta fram. Slik vert kompetansen og forskinga på feltet gjenoppretta, halde ved like og på sikt utvikla. Det er Kunsthall Grenland som har tatt initiativet til Nytt nordisk porselensforum. Boka skal komme ut på Arnoldsche Art Publishers i engelsk, norsk, dansk og svensk språkdrakt.
Det nyoppretta Senter for keramisk kunst (SKK) i Ringebu vil samle kunstnarsamtalar i bokform. Samtalene skjedde på arrangement i samband med utstillingar ved senteret. Bokprosjektet vil bli lansert på kunstbokmessa B*stard i samband med Litteraturfestivalen i Lillehammer til sommaren. Dette er formidlingstiltak som ein ser vil kunne løfte prosjektet.
Manusutviklingsstøtta skal stimulere til å skrive om samtidskunst i det visuelle kunstfeltet. Det var 6 søknader i denne runden og kun eitt prosjekt vart tildelt støtte. Hanne Ramsdal skal utvikle ein tekst om barnefordeling der det dokumentariske materialet skal resultere i eit tekstbasert performativt verk til Spriten kunsthall.
Kunst- og kunstnarbøker og pandemien
I denne runden var det fleire godt utvikla og gjennomarbeidde prosjekt som vart vurdert. Det kan hende at pandemiens verknader i samfunnet kan forklare at talet på søknader om monografiar eller større bøker om teoretiske vinklingar på samtidskunsten held seg såpass høgt. Tilbaketrekkinga til atelieret fører kanskje til større fokus, det vert tid til å gå gjennom og oppsummere kunstnarskap til bokprosjekt, sjølv om (separat)utstillingar har vore utsett eller avlyst.
Det var 9 kvinner og 8 menn som fekk støtte, i tillegg til 1 småbokforlag og 4 mindre institusjonar og stiftingar. Fylkesvis fordeling av tildelingane er 10 frå Oslo, 8 frå Vestland, 2 frå Vestfold og Telemark, 1 frå Innlandet, 1 frå Rogaland.
Prosess:
-
Søknadsfrist: 2.9.2021 kl. 13:00
-
Vedtak i faglig utvalg for billedkunst og kunsthåndverk: 19.11.2021
-
Vedtak i rådsmøte: Dato ikke satt
Søk i tabellen
Søk i tabellen
| Søker | Prosjekttittel | Fylke | År | Søknadssum | Vedtaksdato | Vedtak | Tilskudd | Sjanger |
|---|