Kulturrådets strategi for 2025–2028

Kulturrådets oppdrag

Kulturrådets oppdrag er nedfelt i eiga lov, der det heiter:

§ 1 Kulturrådet har som formål å stimulere samtidens mangfoldige kunst- og kulturuttrykk og å bidra til at kunst og kultur skapes, bevares, dokumenteres og gjøres tilgjengelig for flest mulig.

§ 2 Kulturrådet er et statlig forvaltningsorgan som har hele landet som virkeområde.

Kulturrådet skal forvalte Norsk kulturfond og andre statlige tilskudd som er lagt til rådet, og være et rådgivende organ for staten i kulturspørsmål.

Norsk kulturfond er den viktigaste statlege finansieringskjelda for det frie kunst- og kulturlivet over heile landet. Frå over førti tilskotsordningar gir Kulturrådet midlar til kunstnarar, arrangørar og verksemder innan visuell kunst, scenekunst, musikk, litteratur, tidsskrift og kritikk, kulturvern, tverrfaglege uttrykk og forsking. Kulturrådet famnar alt frå dokumentasjon og formidling av historie, handverk og tradisjonsuttrykk, via det nyskapande og eksperimentelle innan kunstområda til kunnskapsbygging og bygging av infrastruktur og arenaer for kulturaktivitet.

Noregs grunnlov slår i § 100 fast at «ytringsfridom skal det vere». I same paragraf ligg det såkalla infrastrukturkravet: «Dei statlege styresmaktene skal leggje til rette for eit ope og opplyst offentleg ordskifte.» Dette omfattar også kunstnarlege og kulturelle ytringar. Kulturrådets funksjon og oppdrag i det norske samfunnet er særs viktig for å oppfylle infrastrukturkravet.

Grunnlag for Kulturrådets arbeid i strategiperioden

Kulturrådet skal verne om ytringsfridom for enkeltmenneske og grupper i befolkninga. Vi skal gi moglegheit til å skape og utøve eit breitt spekter av kunst- og kulturuttrykk. Gode økonomiske vilkår for kunstnarane, er avgjerande for eit mangfald av kunstnarlege ytringar og for likare moglegheit(er) for deltaking i kulturlivet. Kulturrådet skal arbeide for betre tilgang til eit godt utval kunst- og kulturopplevingar for befolkninga over heile landet.

Kulturrådet skal verne om armlengds avstand som eit grunnleggande prinsipp i norsk kulturpolitikk. Prinsippet skal sikre kunstnarar og kulturaktørar moglegheit for frie ytringar utan innblanding frå styresmaktene. Vi skal arbeide for auka forståing av prinsippet hos styresmaktene og i samfunnet, og for at ein større del av kulturbudsjettet skal bli fordelt av armlengdeorgan som Kulturrådet. Dette er viktig for maktspreiing og som bolverk mot ei negativ utvikling vi kan sjå i andre land, også i USA og Europa, når det gjeld kunstnarleg fridom og ytringsmangfald.

Kulturrådet ser kunst- og kulturlivet som samfunns- og fellesskapsbyggande. I ei tid prega av krig, konflikt og usikkerheit vil vi fremje kulturen si rolle som ein sentral infrastruktur i samfunnet. Kulturrådet vil følgje med på korleis teknologiutvikling påverkar korleis kunst blir skapt og formidla, og kva det vil ha å seie for vilkåra for kunst- og kulturlivet.

Kulturrådet skal fremje og famne ei størst mogleg breidde av kunst- og kulturuttrykk. Mangfald er drivkraft for kvalitet og nyskaping, og vi må forsvare verdien eit breitt spekter av kunst- og kulturuttrykk har for samfunnet.

Kulturrådet vil heile tida ha eit kritisk og reflekterande blikk på eige arbeid og ansvar. Vi skal føre ein kontinuerleg diskusjon om våre prioriteringar og om ulike forståingar av kvalitet og profesjonalitet. Vi vil arbeide aktivt for å avdekke blindsoner i kulturfeltet og i eigen tildelingspraksis. Vi vil møte aktørar og representantar for kulturuttrykk vi i dag har lite kontakt med. Vi skal bygge ned hindringar for kulturaktørar med arbeidsmåtar som utfordrar dei eksisterande ordningane. Kulturrådet skal oppsøke kunnskap, og igangsette eigne kunnskapsprosjekt der dette er nødvendig.

Kulturrådet skal kjempe for kulturarbeidsplassar og kompetansemiljø over heile landet. Kunst- og kulturarbeidarar skal ha like moglegheiter til å skape, utøve og formidle kunst og kultur, uavhengig av til dømes kjønn, klasse, kulturbakgrunn, funksjonsnivå og geografi.

Særskilte satsingsområde i strategiperioden

Auka mangfald, fleire stemmer

Kulturrådets arbeid med å auke mangfaldet i kunst- og kulturlivet inneber å opne for nye uttrykk og kvalitetar, og gi plass til erfaringar frå ståstader som tidlegare har vore marginaliserte og underrepresenterte. Å oppnå auka mangfald krev eit langsiktig arbeid. Kulturrådet vil ha eit kritisk blikk på eiga forvalting, og sette i verk tiltak for å løfte fleire stemmer og eit større meiningsmangfald i kunst- og kulturfeltet. Dominerande kvalitetsforståingar, avgrensing i ulike kunst- og fagområde etablert ut frå éin tradisjon, skal ikkje verke som hinder for kulturutøvarar som opererer innanfor andre tradisjonar og logikkar. Kulturrådet vil arbeide mot eit klassedelt kulturfelt. Kulturrådet skal arbeide for ein styrka kunstnarøkonomi og betre vilkår for å drive kunstnarleg aktivitet. Vi skal arbeide for å fjerne barrierar som gir delar av befolkninga dårlegare vilkår for å verke som kunstnarar.

Auka likeverd for det samiske urfolket og nasjonale minoritetar

Sannhets- og forsoningskommisjonen har dokumentert at det samiske urfolket og nasjonale minoritetar i Noreg gjennom historia har opplevd – og framleis opplever – systematisk utanforskap og manglande anerkjenning i kulturlivet og samfunnet elles. Det gjeld også dei nasjonale minoritetane som ikkje blir omtalt i rapporten. Urett og overgrep overfor skogfinnar, kvenar, norskfinnar, jødar, samar, romar og romanifolk/tatarar har ført til tap av språk, kultur og identitet, marginalisering og eit fattigare kulturliv for alle. Kulturrådet vil bidra til at samiske aktørar og nasjonale minoritetar får betre vilkår for kunst og kulturutøving. Kulturrådet skal anerkjenne og støtte opp om kulturutøving som er grenseoverskridande. Språkrikdommen i landet skal bli styrka og synleggjort. Arbeidet skal skje i dialog med aktørar og organisasjonar frå dei gruppene det gjeld.

Eit ope og tilgjengeleg kunst- og kulturliv

Aukande sosial ulikskap gir ulike føresetnader for deltaking i kulturlivet. Kulturrådet vil arbeide for ein kulturell infrastruktur med opne og fellesskapsbyggande arenaer over heile landet. Vi skal redusere barrierar for møte mellom kunst og befolkninga. Kulturrådet vil auke kunnskapen om gruppene som fell utanfor og årsakene til dette. Vi vil støtte tiltak som gjer det lettare å nå ut til grupper som i dag sjeldan nyttar seg av kunst- og kulturtilboda. Barn og unge har same rett til eit breitt tilbod som vaksne. Kulturrådet vil styrke barn og unge sin tilgang til eit tilpassa og mangfaldig kunst- og kulturliv, som speglar deira livsverd og gir fellesskap og tilhøyrsle. Kulturrådet vil arbeide særskilt med å gi menneske med funksjonsnedsetjingar betre moglegheiter for deltaking i kulturlivet.

Eit kunst- og kulturfelt som møter klima- og naturkrisa

Klima- og naturkrisen krev at alle tar del i omstillinga mot eit meir berekraftig samfunn. Kunsten og kulturlivet utgjer viktige arenaer for å utforske komplekse samfunnsspørsmål, bidra til løysingar, formidle kunnskap og skape fellesskap i tider med omvelting. Kulturfeltet må også ta ansvar for eiga belasting på klima og naturmangfald. Omstillinga påverkar vilkår, metodar og kostnadar for produksjon og formidling av kunst og kultur. Kulturrådet vil støtte kunst- og kultursektoren i å ta meir berekraftige val og å tilpasse seg dei endringane som allereie er her. Kulturrådet vil samstundes bidra til at omstillinga ikkje rokkar ved kunstnarane sitt høve til å ytre seg fritt og kritisk, og ikkje aukar forskjellar i vilkåra i kulturfeltet.

Slik skal rådets strategi virkeliggjøres

Rådets strategi skal bli verkeleggjort gjennom

• prioriteringar av tilskot
• dialog med kunst- og kulturfeltet
• planar for kvart fagområde
• forsøksordningar og vidareutvikling av dei faste tilskotsordningane
• kommunikasjonsarbeid som særleg omfattar tilskotsordningane
• samansetning av fagutval
• kunnskapsutvikling
• deltaking i den offentlege samtalen
• råd til offentlege styresmakter i kulturspørsmål