Fagleg utval for forsking

Oppdraget til forskingsutvalet er å bidra til eit solid kunnskapsgrunnlag for Kulturrådet. Utvalet handsamar søknadar til Kulturrådets tilskotsordning for kunst- og kulturforsking.  Det utviklar og utlyser tematiske forskingsprogram. Det bidrar til å følgje opp dei prosjekta som får tilskot og er redaksjonskomité for Kulturrådets bokserie. Forskingsutvalet gir råd til Kulturrådet i spørsmål om forsking og annan kunnskapsproduksjon.

Utval for perioden 2026–2027

Leiar

Jan Fredrik Hovden (f. 1969), Bergen, Vestland. Sosiolog og professor ved sosiologisk institutt ved Universitetet i Bergen. Forskar på breie mønster av sosial ulikskap i befolkninga, spesielt knytt til publikum for kultur- og medieinnhald, offentleg og politisk deltaking, utdanning, og sosiale elitar. Tidlegare styremedlem i IMER (International Migration and Ethnic Relations), er medlem i European Center for the Study of Culture & Inequality og leiar Nettverket for studiar av kultur, ulikskap og demokrati ved UiB. Hovden er medlem i Kulturrådet.

Medlemmar 

Mathias Danbolt (f. 1983), København, Danmark. Kunsthistorikar og professor ved Københavns Universitet. Forskar blant anna i skjeringspunkta mellom kunsthistorie og kolonihistorie i ein nordisk kontekst, med særleg fokus på erindringspolitikk, minnekultur og monument i det offentlege rom. Seinaste utgiving er monografien Tropaganda: Kunst, kolonialisme og kampe om historien (Strandberg Publishing, 2025). Danbolt er vara til Kulturrådet. 

Asbjørn Grønstad (f. 1972), Bergen, Vestland. Professor i visuell kultur ved institutt for informasjons- og medievitskap, Universitetet i Bergen. Leier av forskargruppa «Film, TV & Visuell Kultur». Grønstad har ein doktorgrad i amerikanske studiar (2003) og har publisert ei rekke bøker og artiklar om film, visuell kultur, etikk og  estetisk teori. Seinaste utgivingar er Microutopias and Everyday Hope (red. med Lene Johannessen, 2026) og Free Speech and Neoliberalism: Art, Culture, Education (2026).

Louisa Olufsen Layne (f. 1989), Oslo. Forskar ved Institutt for litteratur, områdestudiar og europeiske språk, Universitetet i Oslo. Har særleg forska på afroamerikansk, karibisk og svart britisk litteratur, men er og opptatt av blant anna populærmusikk, postkolonial teori, internasjonal modernisme og interseksjonalitet. Leiar forskingsprosjektet «Word, Sound and Power: Ord, lyd og makt i den afrikanske diasporaen».

Silje Solheim Karlsen (f. 1976), Alta, Finnmark. Professor i nordisk litteraturvitskap ved Institutt for lærarutdanning og pedagogikk, UiT Norges arktiske universitet, Campus Alta, og professor II ved Sámi allaskuvla. Forskar på litteratur frå nordlege og arktiske område, særleg samisk og kvensk samtidslitteratur, lyrikk og litteraturdidaktiske praksisar. Har brei erfaring frå redaksjonelt arbeid og er opptatt av både forskings- og litteraturformidling.

Sigrid Røyseng (f. 1972), Oslo. Professor i kultursosiologi ved Noregs musikkhøgskole. Ho er ein erfaren kulturforskar som har arbeidd med musikarar sin arbeidssituasjon, kunstnarar si rolle i samfunnet, ei rekke kulturpolitiske problemstillingar og spørsmål om leiing og organisering av kunst og kultur. Ho er òg professor II ved Handelshøyskolen BI. Røyseng leia utvalet bak NOU-en Musikklandet som vart overlevert kulturministeren i juni 2025.