Fagleg utval for litteratur

Utval for perioden 2026–2027

Leiar

Sigbjørn Skåden (f. 1976), Tromsø, Troms. Samisk forfattar frå Tjeldsund i Troms med både samisk og norsk som skrivespråk. Skåden debuterte i 2004 med diktsamlinga Skuovvadeddjiid gonagas (Kongen av skomakarane), og har sidan debuten gitt ut bøker i ulike sjangrar, men er primært romanforfattar. For bøkene har han vore nominert til Nordisk råds litteraturpris, P2-lyttaranes romanpris, Brageprisen og har fått Havmannprisen for årets beste nordnorske bok. Skåden har ei mastergrad i britisk litteratur frå University of York og eit hovudfag i allmenn litteraturvitskap frå Universitetet i Tromsø.

Medlemmar

Hayder Jumaah (f. 2002), Oslo, har bakgrunn frå Mosul i Irak, og har budd i Noreg sidan 2017. Som prosjektmedarbeidar i Leser søker bok /stiftelsen LESE (2019-) har han opparbeidd seg spesialkompetanse på fleirspråkleg litteratur for barn, ungdom og vaksne. Han jobbar med både fleirspråkleg skriving, omsetjing og formidling.

Siri Odfjell Risdal (f. 1978), Stavanger, Rogaland. Spesialrådgivar for bibliotekutvikling ved Rogaland fylkesbibliotek. Utdanna bibliotekar frå HiO, med mellomfag i litteraturvitskap frå NTNU og mastar i lesevitskap frå UiS. Mottakar av NBI-stipendet i 2005. Tilsett på Sølvberget bibliotek og kulturhus frå 2006, der ho m.a. har leidd Barne- og ungdomsbiblioteket, Nordisk barnebokkonferanse og Kapittel – Stavanger internasjonale festival for litteratur og ytringsfridom. Har sete i juryen for m.a. Kulturdepartementets prisar for barne- og ungdomslitteratur, Brageprisen, EUs litteraturpris og Den norske lydbokprisen.

Brynjulf Jung Tjønn (f. 1980), Oslo. Tjønn er fødd i Sør-Korea, men har vakse opp i Feios i Sogn og Fjordane. Han har bakgrunn som journalist og litteraturkritikar. Han har i fleire år vore seniorrådgivar for barne- og ungdomslitteratur i Det norske Samlaget. Han har vore medlem i Det litterære råd for Norske Barne- og ungdomsbokforfattarar (NBU), og har også vore leiar for Den norske Forfatterforening. Han debuterte i 2002 som forfattar, og har skrive ei rekkje bøker for barn, unge og vaksne. Han er tildelt Brageprisen, Kritikerprisen, Samlagsprisen, Ungdommens kritikerpris og Nynorsk litteraturpris. Han debuterte som dramatikar med sceneversjonen av Kvit, norsk mann, som vart nominert til Heddaprisen for beste scenetekst, på Vega scene og Den Nationale Scene i 2024. 

Margunn Vikingstad (f. 1971), Paradis, Vestland, er litteraturkritikar og omsetjar. Ho har hovudfag i nordisk språk og litteratur frå Universitetet i Oslo. Vikingstad var litteraturkritikar i dag og Tid frå 2001 til 2013, og har sidan 2013 vore knytt til Morgenbladet som fast litteraturkritikar. I 2022 gav ho ut essaysamlinga Rapportar frå randsonene. Åtte essay om samtidslitteratur. Vikingstad har omsett dramatikk for Det Norske Teatret og fleire klassikarar i Skald forlag si serie med verdsklassikarar. Den siste omsetjinga hennar var det første Fosseforedraget, Création, av det franske filosofen Jean-Luc Marion som vart halde på Slottet i 2025 og gitt ut i bokform i Nasjonalbiblioteket med tittelen Skaping. Vikingstad er også programansvarleg ved Litteraturhuset i Bergen og universitetslektor i nordisk litteratur ved Universitetet i Oslo.

Varamedlemmar

Tatjana Kielland Samoilow (f. 1977), Trondheim, Trøndelag. Førsteamanuensis i norskdidaktikk ved Institutt for lærarutdanning, NTNU med doktorgrad i allmenn litteraturvitskap. Ho har jobba ved Universitetsbiblioteket i Trondheim og Trondheim folkebibliotek med vekt på litteraturformidling, og sete i programrådet ved Litteraturhuset i Trondheim. Har m.a. gitt ut boka Kritisk teori i litteraturundervisningen saman med Per Esben Myren-Svelstad (2020) og leia forskingsprosjektet Barn og katastrofer. Samoilow er ansvarleg redaktør i Barnelitterært forskningstidsskrift.

Mikkel Øyen (f. 1978), Oslo. Forfattar, formidlar, funksjonshemma og bibliotekansvarleg på ein ungdomsskule i Oslo. Mastergrad i allmenn litteraturvitskap ved Universitetet i Oslo. Har dei siste 18 åra drive det uavhengige litteraturarrangementet med tilhøyrande utgiving Splittet Kjerne. Debuterte som forfattar med novellesamlinga Idiotene i 2024.