Publikum betaler i større grad for kulturopplevingar

– Kulturpublikummet blir stadig meir betalingsvillig. Medan publikummet på gratisarrangement fall i 2025, auka både talet på selde billettar og billettinntektene for fjerde året på rad, seier Torbjørn Urfjell, avdelingsdirektør for samfunn og arena i Kulturdirektoratet.

Talet på selde billettar auka i 2025 med om lag 62 000 til 2,2 millionar. Billettinntektene auka samtidig med 13,4 prosent.

Færre gratisbesøk trekkjer ned det samla publikummet

Seks av ti publikum var betalande i 2025. Resten av publikummet var med på gratisarrangement eller hadde fri- og sponsorbillettar.

Publikum på gratisarrangement gjekk ned med om lag 9,9 prosent frå 2024 til 1,1 millionar besøk. Talet på fri- og sponsorbillettar auka derimot noko.

Festivalane hadde langt fleire gratisbesøk enn resten av institusjonane. Nesten to av tre publikummarar på festivalane var med på gratisarrangement, mot om lag éin av tre ved teater, orkester og andre institusjonar.

Publikumstalet gjekk også i ulik retning. Festivalane hadde rundt 30 000 færre besøk enn i 2024, medan besøket ved resten av institusjonane var stabilt.

Fleire arrangement for barn og unge

Det vart arrangert om lag 18 900 konsertar, framsyningar og formidlingsaktivitetar i 2025, ein nedgang på rundt 600 arrangement frå året før.

Samtidig gjennomførte verksemdene rundt 700 fleire arrangement for barn og unge enn i 2024, totalt om lag 7 400.

– Tilbodet til barn og unge skil seg ut i statistikken i år. Sjølv om det totale aktivitetsnivået gjekk noko ned, utgjer arrangement for barn og unge no nær fire av ti arrangement, seier Urfjell.

Eigeninntektene veks

Institusjonane auka eigeninntektene sine til 1,3 milliardar kroner i 2025, opp 7,9 prosent frå året før. Billettsal stod for over halvparten av inntektene. Det kjem både av at fleire kjøpte billettar og at gjennomsnittsprisen auka frå 309 til 341 kroner.

Festivalane henta 52 prosent av inntektene sine frå billettsal og andre eigne inntekter. For teater, orkester og operaselskap var andelen 19,4 prosent.

Samtidig auka dei offentlege tilskota med 359 millionar kroner til 4,5 milliardar kroner. Denne auken var større enn lønns- og prisveksten i 2025.

Lågare lønnsdel og positivt årsresultat

Lønnskostnadene auka med 1,2 prosent i 2025. Sidan prisane steig meir enn dette, gjekk lønnskostnadene reelt sett ned. Samtidig auka andre kostnader, som husleige og pensjon, med 18,3 prosent frå året før.

Lønn utgjorde 50,2 prosent av dei samla kostnadene i 2025, ned frå 54,1 prosent i 2024. Festivalane skil seg ut ved at lønnskostnadene berre utgjer om lag ein firedel av utgiftene.

Institusjonane gjekk samla med eit overskot på rundt 158 millionar kroner i 2025. Dette kjem i stor grad av berekningar av framtidige pensjonskostnader hos enkelte store teater og orkester. Slike kostnader kan variere mykje frå år til år.

Festivalane gjekk samla med eit underskot på om lag 6 millionar kroner, men det er store forskjellar mellom kvar enkelt verksemd.