Sebrudahka valjes dájdajn ja kultuvrajn
Kulturdirektoráhtta l stáhtalasj doajmma Kultur- ja dássádusdepartementa vuolen. Mij barggap vaj dájdda ja kultuvrra galggá ienep ulmutjijt jåksåt, ja tjalmostip kulturiellema ájnas rållav sebrudagán.
Kulturdirektoráhtta galggá viehkedit åvddånahttet gájkka bielijt vuona kultuvras – stuorra rijkalasj institusjåvnåjs gitta unna, bájkálasj dåjmajda. Mij barggap moattebelak ja ådådahkke dájdda- ja kulturiellema hárráj gånnå dájddárijn la friddjavuohta, ja gånnå l sadje ådå åvddånbuktemijda.
Ruhtadårjajt háldadit
Kulturdirektoráhta oajvvedahkamusájs la dåjmadahkan liehket Kulturrádáj, Stáhta dájddárstipænndaj ja Fond for lyd og bilde-årnigij, ma ruhtadårjajt juollodi dájddárijda ja ietjá kulturdoajmmaoassálasstijda. Dá gålmmå iesjrádálasj orgána rudájt juollodi dájdda- ja kulturfágalasj dájdo milta, gieda guhkev ierit oajvemusájs. Gieda guhkev ierit merkaj oajvemusá e oattjo vájkkudit doarjjajuollodimijt. Dájdan la ietjanis árvvo ja galggá friddja liehket.
Ådå ja ådåstuvvam máhtov juohket ja fágalasj rádijt fállat
Kulturdirektoráhtta dahká guoradallamijt ja diedádusájt kultursuorge birra ma aneduvvi politihka hábbmima vuodon, ja ma lasedi álmmuga diedov. Diedujn vuona ja rijkajgasskasasj kulturdoajmmaoassálasstijs viehkedip máhttuj tjanádum ja boahtteájggásasj kultursuorge hárráj.
Institusjåvnåjt åvddånahttet ja kulturárbev huksat
Kulturdirektoráhtan la åvdåsvásstádus åvddånahttet musiejajt, musihkka- ja siednadájddainstitusjåvnåjt ja ietjá kultuvrradåjmajt. Mij ruhtadårjajt juollodip ma viehkedi institusjåvnnåsuorgev åvddånahttet ja árvustallap åhtsåmusájt rijkalasj kulturviesojda. Duodden barggap bisodittjat ja gaskostittjat vuona kulturárbev, sæmmi båttå gå háldadip årnigijt ma nanniji ja duodasti rijkalasj unneplågoj kulturárbev. Mij juollodip aj rudájt amatørteáhtarijda ja histåvrålasj spelajda.
Lasedit moattevuodav ja buoredit máhttelisvuodajt oassálastátjit
Dájdda ja kultuvrra galggá gájkajda liehket. Rijkalasj dåmadiddjen moattevuodas kultursuorgen barggap dåjmalattjat vaj ienebu galggi oassálasstet gæhttjen ja gulldaliddjen, dájddárin jali ásadiddjen. Mijá moattevuodabargo guovdátjin li ållagasj vuojnos unneplågo, ulmutja doajmmahæbodimij, sáme álmmuk ja rijkalasj unneplågo.
Lasedit lånudimev ja binnedit ráddjimav
Kulturdirektoráhta rijkajgasskasasj barggo galggá viehkedit nannit dájdalasj friddjavuodav ja moalgedimfriddjavuodav ja dilev láhtjet vaj doajmmaoassálasste Vuonas ávkkiji rijkajgasskasasj máhttelisvuodajt. Mij doarjjop aktisasjbargov ja lånudimev mij tjårggi åvddånahttemav vuona kultursuorges ja kulturárbes.
Miján la åvdåsvásstádus Kreativt Europa-prográmmas, EØS-rudájs ja guládallamis UNESCO:jn ja ietjá rijkajgasskasasj orgánaj. Kultuvrra l rájádis, ja juohkkahattjan galggá sæmmi rievtesvuohta dájdav ja kultuvrav åvddån buktet.
Guoddelis åvddånimev ja innovasjåvnåv tjårggit
Kultursuorgge goappátjagá vájkkuduvvá ájnas sebrudakrievddamijs ja arvusmahttá ájnas sebrudakrievddamijt. Kulturdirektoráhtta barggá tjalmostittjat gåktu dájdda ja kultuvrra vájkkut ietjá sebrudaksuorgijt, ja la jådedimfábmon guoddelap kultursuorgev tjårggitjit.