Yhtheiskunta joka oon rikas taitheesta ja kulttuurista
Kulttuuridirektoraatti oon staatilinen toimiija kulttuuri- ja tasa-arvodepartementin alla. Met työtelemmä sen etheen ette taiet ja kulttuuri sauttaa usheempii ja ette kulttuurielämän tärkkee rooli samfynnissä olis näkkyyvä.
Kulttuuridirektoraatti eesauttaa siinä ette koko norjalaisen kulttuurin laajuus eistyy – suurista nasunaalisista institusuuniista kiini pienhiin, paikalishiin uushiin toimhiin. Met työtelemmä moninaisen ja uutta luovan taiet- ja kulttuurielämän etheen, jossa taitheiliijoila oon vaphaus ja jossa oon sija uusile ilmaisuile.
Hallittee lisärahhoi
Yksi Kulttuuridirektoraatin päätehtävistä oon toimiit sekretariaattina Kulttuuriraatile, Staatin taitheiliijastipendille ja «Fond for lyd og bilete» -fondile jokka anttaavat lisärahhoi taitheiliijoile ja muile kulttuuriaktööriile. Nämät kolme henkkaamatonta orgaaniita anttaavat lisärahhaa taiet- ja kultuurifaakilisten arvelusten jälkhiin, käsivarren ethäisyyelä hallittemisvalloista. Käsivarren ethäisyyelä meinathaan tässä sitä ette hallittemisvalloila ei ole lupa sekkainttuut siihen kuka saa lisärahhaa. Taitheela oon oma-arvo ja se pittää olla vapaa.
Jakkaa uutta ja aijantasaista tiettoo ja anttaa faakilista neuvoo
Kulttuuridirektoraatti jakkaa analyyssiitä ja raporttiita kulttuurisektorista. Net eesauttaavat politikin haamustamisessa ja anttaavat pyblikymile pareman ymmäryksen. Se laaja ylinäkymä mikä meilä oon norjalaisista ja kanssoinvälisistä kulttuuriaktööriistä, auttaa kulttuurisektorii olemhaan tietopohjainen ja suuntaamhaan tulleevaisuutheen.
Eistää institusuuniitta ja eesvastaa kulttuuriperinöstä
Kulttuuridirektoraatilla oon eesvastaus eistäät museumiita, musikki- ja seenitaietinstitusuuniita ja muita kulttuuritoimiijoita. Met annama lisärahhaa joka eesauttaa kulttuurikentän eistämistä ja arvelemma hakemuksiita kansalisile kulttuuripytingiile. Met työtelemmä kans sen etheen ette norjalaisesta kulttuuriperinöstä otethaan vaarin, ja samala met hallittemma oorninkkita jokka lujittaavat ja dokumenteeraavat kansalisten minoriteetiitten kulttuuriperinttöö. Met annama lisärahhaa kans amatööriteatteriile ja historialisile näyttämäpelile.
Luopi moninaisuutta ja pittää saantheila
Taiet ja kulttuuri kuuluu kaikile. Met olema moninaisen kulttuurisektorin kansalinen koordinaattori ja työtelemmä aktiivisesti sen etheen ette usheemat oon myötä pyblikymissä, taihteiliijoina tahi arransöörinä. Meän työ moninaisuuen oon eriliikaisesti suunattu näkkyyville minoriteetiile, persoonille joila oon funksuuniestet, saamelaisele väjele ja kansalisile minoriteetiile.
Enämen vaihetusta ja vähemän rajjoi
Kulttuuridirektoraatin kanssoinvälinen työ auttaa lujentamhaan taihteelista vaphautta ja sananvaphautta, ja anttaa pohjan sille ette aktöörit Norjasta hyöttyyvät kanssoinvälisistä maholisuuksista. Met annama kuurttoo yhtheistyöle ja vaihetuksele joka turvaa norjalaisen kulttuurisektorin ja kulttuuriperinön eistämisen.
Meilä oon eesvastaus Kreativt Europa -programista, EØS-rahoista ja kontaktista UNESCON ja muitten kanssoinvälisten orgaaniitten kans. Kulttuuri ei tunne rajjoi, ja kaikila häyttyy olla oikkeus ilmaista itteensä taiet- ja kulttuuri-ilmaisuitten kautta.
Turvaa kantamavoimaisen kasvun ja innovatiivisen kulttuurisektorin
Tärkkeet yhtheiskunnan muutokset vaikuttaavat kulttuurisektorhiin joka oon samala eeläkulkkiija muutoksissa. Kulttuuridirektoraatti tekkee näkkyyväksi taitheen ja kulttuurin vaikutuksen muihin yhtheiskunnan alhoin, ja oon triivaamisvoima siinä ko pykäthään klima- ja luontoystävällistä kulttuurisektorii.