Rekordmange museumsbesøk i 2025

– Det er gledeleg å sjå at så mange besøkjer musea. Musea forvaltar og formidlar kunst, kulturarv og kunnskap og jobbar aktivt for å vere opne, inkluderande og relevante for alle, seier Torbjørn Urfjell, avdelingsdirektør for samfunn og arena i Kulturdirektoratet.

Musea som får tilskot over statsbudsjettet hadde rekordmange besøk i 2025, med rundt 7,5 millionar besøkjande, viser rapporten «Det nasjonale museumsnettverket i 2025». Det er 7 prosent fleire enn året før og det høgaste besøkstalet registrert dei ti siste åra. 

Færre barn og unge på museum

Samtidig som besøkstala gjekk opp, gjekk andelen barn og unge som besøkte musea ned. Barn og unge stod for 21,8 prosent av besøkjande i 2025, mot 26,8 prosent i 2024. Det er den lågaste andelen på ti år. 

Auka aktivitet innan forsking og formidling

I 2025 har musea rapportert om fleire typar kunnskapsarbeid enn før. Tala viser at musea deltek i fleire forskings- og utviklingsprosjekt, og at dei gir ut fleire publikasjonar som årbøker, antologiar og utstillingskatalogar. 

Det utvida datagrunnlaget viser også tydelegare korleis musea bidreg i offentlegheita. Mange delar kunnskap gjennom intervju, podkastar, kronikkar og lesarinnlegg.