Gi innspel om levande tradisjonar i Noreg

Immateriell kulturarv er levande tradisjonar, uttrykk, kunnskap og ferdigheiter som blir førte vidare mellom generasjonar. Det kan vere alt frå songar, forteljingar, handverk, mattradisjonar og høgtider.

 – Immateriell kulturarv lever gjennom menneska som utøver, fører vidare og utviklar han. Derfor treng vi kunnskap frå tradisjonsberarane,  dei som kjenner tradisjonane og praksisane frå innsida, og frå aktørar som legg til rette for at kulturarven kan leve vidare, seier Torbjørn Urfjell, avdelingsdirektør for samfunn og arena i Kulturdirektoratet.

Bidra med erfaringane dine

Kulturdirektoratet startar no arbeidet med den neste rapporteringa til UNESCO om immateriell kulturarv i Noreg. Rapporten gir kunnskap som kan styrkje arbeidet med levande tradisjonar og bidra til deling av erfaring internasjonalt.

Til dette treng vi ulike erfaringar og perspektiv. Vi ønskjer innspel frå utøvarar, tradisjonsberarar, organisasjonar, fagmiljø, institusjonar og offentlege aktørar. Del gjerne erfaringar frå eigen praksis, miljø eller organisasjon. Du treng ikkje å ha oversikt over heile feltet for å bidra.

Innspela blir samla inn gjennom eit spørjeskjema med seks temadelar. Du vel sjølv kva du vil svare på, og kan lagre og redigere svara dine fram til fristen 1. februar 2027.  

Vil du førebu svara dine før du fyller ut spørjeskjemaet, kan du laste ned skjemaet som PDF:

• Spørjeskjema på nynorsk
• Spørjeskjema på bokmål