Kulturrådet har utnemnt nye utval for perioden 2026–2027
Halvparten av medlemmene er nye og halvparten gjenutnemnde, noko som sikrar fornying og kontinuitet.
Sjå oversikt over alle utvala nedst i saka.
– Det er viktig at kunst- og kulturfeltet har tillit til at avgjerder blir tekne av personar som er uavhengige av særinteresser, har høg fagleg kompetanse og god kjennskap til feltet i heile landet, seier Kristian Seltun, leiar av Kulturrådet.
Fornying og breidd er viktig
I samansetninga av utvala har Kulturrådet lagt vekt på mangfald i fagkompetanse om sjangrar og uttrykk, bakgrunn og erfaring, roller i feltet, geografisk tilhøyrsel og alder. Utvala omfattar også fagfolk med ulike minoritetserfaringar. Og Kulturrådet har sikra at utvala har kjønnsbalanse i tråd med likestillingslova.
Om utvala
- Kulturrådet har 15 fagutval og 9 vurderingsutval.
- Fagutvala behandlar søknader, bidreg til utviklinga av tilskotsordningane og gir tilrådingar til Kulturrådet.
- Vurderingsutvala innan litteratur vurderer påmelde bøker til innkjøpsordningane for ulike sjangrar.
- Den samla kompetansen frå utvala skal bidra til å nå formålet i kulturrådslova og Kulturrådets strategi for 2025-2028
- Medlemmer av Kulturrådets utval utnemnast for to år.
Omsyn til habilitet
Kulturrådet har bede om ein ekstern gjennomgang av medlemmers tilgang til å søkja tilskot. I påvente av utgreiinga skal medlemmer som søkjer tilskot frå eige utval, ikkje delta i behandlinga av søknader i den søknadsrunden der søknaden deira blir behandla. Tidlegare var medlemmer kun inhabile under behandlinga av sin eigen søknad.
Les om utlysinga av utgreiinga her
– Me har i større grad valt kandidatar som ikkje er avhengige av å søkja tilskot, og auka talet på varamedlemmer, slik at rett kompetanse er tilgjengeleg når nokon må fråtre. Det betyr ikkje at inhabilitet ikkje vil oppstå, men me skal handtera det, slik at befolkninga har tillit til avgjerdene som blir tekne i utvala på vegner av Kulturrådet, seier Seltun.
Startar arbeidet no
Kulturådet fekk 400 forslag til nye medlemmer av utval.
– På vegner av Kulturrådet vil eg takka alle som har sendt inn forslag til kandidatar. Innspela har hjelpt oss å bli merksame på nye fagpersonar, seier Seltun.
Dei nye utvala startar arbeidet sitt med ein gong. Søknader som kom inn til søknadsfristen 15. januar ligg allereie klare til vurdering.
