Utlysning: Kulturrådet satsar på visuell kunst for barn og unge

Kunst tilpasset barn og unge

Finst det ein visuell kunst for barn og unge? Overraskande mange vil nok svara nei på dette spørsmålet. Kunst som blir vist i galleri, kunsthallar og museum er sjeldan eller aldri laget for ei viss aldersgruppe. Årsaka kan vera ei førestilling om at den visuelle kunsten alltid er like gyldig og tilgjengeleg for alle.

Kulturrådet vil utfordra førestillinga om den universelle karakteren til den visuelle kunsten og lyser derfor ut ekstra midlar til produksjon av visuell kunst for barn og unge.

Utbreidd og anerkjent på andre kunstområde

På andre kunstområde, som film, litteratur og musikk er kunstverk retta mot barn og unge utbreidd og anerkjent. Det blir òg skapt visuell kunst for denne aldersgruppa, for eksempel i tilknyting til skulebygg. Kunsten som blir vist i kunstinstitusjonane sine utstillingsrom, er derimot sjeldan spesielt retta mot barn og unge.

– Det finst mange gode verkstader, råd og formidlingsprosjekt som involverer barn og unge. Men desse har ofte ei laus tilknyting til det kunstnariske programmet til visningsstadene, noko som skjer ved sida av hovudstillingane, seier Toril Johannessen, rådsmedlem i Kulturrådet og leier for fagleg utval for visuell kunst. 

Dei ønskjer å stimulera kunstnarar til å skapa verk som snakkar direkte til barn og unge og tek dei på alvor som kunstpublikum.

– Me tenkjer at dette er ei kunstfagleg interessant utfordring både for kunstnarane som skaper kunsten og for visningsstadene som viser han, seier Johannessen. 

Rettar seg mot kunstnarar

Satsinga er eit samarbeid mellom Kulturrådets to fagutval for visuell kunst. Johannessen er utvalsleiar for fagleg utval for visuell kunst, som behandlar søknader frå kunstnarar. Steffen Håndlykken er utvalsleiar for arrangørutvalet for visuell kunst, som behandlar søknader frå visningsstader.

Utlysinga om prosjekt for barn og unge rettar seg mot kunstnarar, sjølv om det er visningsstadene som må vera søkjarar.

– Me ønskjer å nå kunstnarane gjennom visningsstadene. Dette er ei nyskapande satsing, både når det gjeld form og innhald. Formålet er å inspirera kunstnarar til å tenkja nytt når det gjeld kunst for barn og unge, og at resultatet skal visast som ein del av hovudprogrammet til visningsstaden, seier Håndlykken.

Rammer og krav og søknadsfrist

Målet med satsinga er tredelt:

• Stimulera biletkunstnarar, fotografar og kunsthandverkarar til å skapa kunst for barn og unge.
• Oppmuntra visningsstader til å visa kunst for barn og unge innanfor det ordinære programmet sitt.
• Gi barn og unge gode kunstopplevingar.

Det er visningsstaden som søkjar, med eit prosjekt forma ut av kunstnaren. Det blir gitt tilskot i spennet mellom 150 000 og 500 000 kroner. Tilskotet skal først og fremst dekkja honorar til kunstnaren og produksjonskostnader. Kulturrådet fullfinansierer som hovudregel ikkje prosjekt. Det er derfor ein føresetnad at visningsstaden bidreg med eigne midlar. 

Prosjektet skal visast offentleg som ein del av det kunstnariske programmet på visningsstaden. Det er ikkje mogleg å søkja tilskot til regulære formidlingsprosjekt som barneverkstader og omvisingar i denne satsinga. Ramma for barn og unge-satsinga er tre millionar kroner. Meir utfyllande informasjon om denne satsinga vil bli presentert på Kulturrådets nettside i oktober. 

Utlysningen er knytt til tilskotsordninga Visuell kunst – produksjon og formidling – visningssteder.