Ny ordning på plass for fri scenekunst – etablerte verksemder
Jo Strømgren Kompani. Foto: Jubal Battisti
I statsbudsjett for 2024 vart det løyvd 19,4 millionar kroner til den nye ordninga for etablerte scenekunstgrupper. No er retningslinjene klare og søknadsvindauget opnar i mai.
– Denne ordninga skal bidra til å sikra meir føreseielegheit og langtidsperspektiv for etablerte scenekunstgrupper, og eg er glad for at Kulturrådet har fått retningslinjene på plass så raskt etter Stortingets vedtak. I samspel med Kulturrådets andre ordningar vil dette bidra til å sikra at dei mest erfarne scenekunstgruppene våre kan halda fram med å produsera god og spennande scenekunst i åra framover, seier kultur- og likestillingsminister Lubna Jaffery.
I Noreg finst fleire sterke og veletablerte frie grupper som skaper scenekunst av høg kvalitet og det har lenge vore ønskjeleg å få på plass ei søkbar ordning. Etter at Stortinget slutta seg til regjeringsforslaget, kan Kulturrådet no presentera korleis den nye ordninga Fri scenekunst – etablerte verksemder blir.
Kven kan søkja?
Verksemder i Noreg som kan visa til scenekunstnarisk aktivitet i minst 15 samanhengane år med eit høgt aktivitetsnivå. Unntak frå kravet om scenekunstnariske aktivitetar gjennom 15 år, kan gjerast i tilfelle der verksemda har hatt eit opphald i produksjon og visningsaktivitet i løpet av denne perioden. Det skal då gjerast greie for årsaka til dette opphaldet.
Scenekunstnarar som får tilskot over Kulturdepartementets budsjett eller frå Kulturfondets avsetning fri scenekunst – kunstnarskap kan ikkje forventa å bli prioritert i denne ordninga.
Kva kan søkjast om?
Det kan søkjast tilskot til delfinansiering av utgiftene verksemda har til produksjon og formidling av scenekunst, og dessutan administrasjonsutgifter som er knytt til desse aktivitetane. Det kan søkjast om inntil 3 mill. kroner til dekning av kostnadene for verksemda for kvart av dei åra i den omsøkte perioden. Omsøkt beløp kan ikkje overstiga 70 % av totalbudsjetta for verksemda. 30 % av budsjettet skal innehalda andre finansieringspartnarar og eigeninntekter.
Unntaksåret 2024
I og med at 2024 er godt i gang blir det gjort unntak frå normal søknadsfrist året før tilskotsperioden blir sett i gang. For at midlane skal komma scenekunstfeltet til gode så raskt som mogleg, så opnar Kulturrådet søknadsvindauget i mai med frist tysdag 4. juni 2024. Søknader kan då gjelda dekning av kostnader i søknadsåret 2024 og for åra framover.