Kulturrådet etablerer tilskotsordning for kunst- og kulturforsking
Den nye tilskotsordninga skal dekke breitt, men i 2025 er òg nokre av forskingsmidlane øremerka urfolk og nasjonale minoritetar. Biletet er frå den samiske kulturfestivalen Márkomeannu i 2024. Foto: Steve Nilsen
Kulturrådet lyser ut ny tilskotsordning der kunst- og kulturforskarar kan søke om støtte til eigne prosjekt. Samtidig vert det lysa ut masterstipend. Søknadsfristen er 2. april 2025.
Kulturrådet har heilt frå starten av jobba med systematisk kunnskapsproduksjon. Gjennom åra har det blitt gjennomført fleire store forskingssatsingar, og ei rekke evalueringar og utgreiingar. Målet har vore å styrkja kunnskapen og bidra til refleksjon og omgrepsdanning i kultursektoren.
No ønsker Kulturrådet å styrke forskingsinnsatsen ytterlegare. Det er vedteke å etablere ei eiga tilskotsordning for forsking.
– Kunst- og kulturfeltet er i rask endring og står overfor store utfordringar. Både Kulturrådet og sektoren har stort behov for meir kunnskap. Vi håpar at tilskotsordninga kan bidra til dette, og til å styrkja forskingsmiljøa, seier Jan Fredrik Hovden.
Han er rådsmedlem og leiar av Kulturrådet sitt forskingsutval, som skal behandla søknadar til tilskotsordninga. Til dagleg er Hovden professor ved Universitetet i Bergen.
Ønsker nye stemmer og perspektiv
– Forskingsmiljøa innafor kunst- og kulturfeltet er ofte små, spreidde og underfinansierte. Ofte er det snakk om enkeltforskarar. Dei store forskingsprogramma frå Norges forskingsråd og EU gir lite rom for småskala, feltnær og nysgjerrigheitsdriven kunst- og kulturforsking, som er veldig viktig for oss. Desse miljøa treng fleire finansieringskjelder, og ikkje minst treng kulturforskinga fleire forskarar. Vi ønsker nye stemmer og perspektiv velkommen, seier Hovden.
I retningslinjene heiter det at formålet til den nye tilskotsordninga er «å styrke forsking med relevans for Kulturrådet, kulturpolitikken og kunst- og kultursektoren generelt», og at den skal «bidra til å få fram ny kunnskap, rekruttere nye forskarar og styrke eksisterande forskingsmiljø». Ut over dette legg ikkje tilskotsordninga sterke føringar på kva for prosjekt som kan få støtte.
– Heller enn å detaljstyre, vil vi la forskarane sjølv fremme det dei synest er viktig og interessant. Slik er ordninga i sin logikk nokså lik dei andre ordningane til Kulturrådet. Ein støttar gode prosjekt men kva som er gode prosjekt, er opp til feltet å foreslå, understrekar Hovden.
Prøveprosjekt over tre år
Tilskotsordninga er i første omgang eit prøveprosjekt over tre år. Det blir ei utlysing kvart år, med søknadsfrist på våren. Samla vert det lysa ut rundt to millioner kroner i 2025. Det er mogleg å søkje om tilskot til både små og stor prosjekt. Den høgaste søknadssummen er fire hundre og femti tusen.
– Samstundes vil vi gjerne støtte prosjekt som treng langt mindre summar. Nokre gangar kan sjølv små midlar vere nok til å realisere gode idear. Av den grunn legg me også vekt på at både søknadsskrivinga og rapporteringa skal vere enkel, seier Hovden.
Sjå retningslinjer for tilskotsordninga her.
Eit særleg fokus på urfolk og nasjonale minoritetar
I retningslinjene oppmodar Kulturrådet forskarar med ulike minoritetserfaringar til å søke. I årets utlysing er i tillegg nokre av tilskotsmidlane øyremerka prosjekt som tek føre seg samisk kunst og kultur, og kunsten og kulturen til dei nasjonale minoritetane, inkludert rammene og vilkåra for utøving av denne kunsten og kulturen.
– Kulturrådet ser at det er behov for meir forsking på kunst- og kulturutøvinga til samar og nasjonale minoritetar. I sitt budsjettinnspel for 2026 har derfor Kulturrådet bedt om ti millionar kroner til ei større forskingssatsing. Årets øyremerking er ikkje nok, men vi håper dette kan vere ein start, og at det kan motivere til forsking som er relevant både for forvaltninga og sektoren generelt. Slike prosjekt kan sjølvsagt òg få midlar frå den ordinære potten, presiserer Hovden.
Masterstipend
I tillegg til forskarprosjekta, lyser Kulturrådet ut inntil fire masterstipend, kvart stipend på tjue tusen kroner. Søknadsfristen er den same som for forskarprosjekta, 2.april. Også her er målet å bidra til ny kunnskap som er relevant for Kulturrådet, kulturpolitikken og kunst- og kultursektoren generelt. Men minst like viktig er det å rekruttere framtidige forskarar til feltet.
– Det er alltid behov for nye stemmar inn forskingsfeltet. Samstundes gler vi oss til å sjå kva for nye idear og perspektiv masterstudentane bringer med seg, seier Hovden.
Kulturrådet si utlysing av masterstipend kjem samstundes med ei tilsvarande utlysing frå Kulturdirektoratet. For nokre studentar vil det være mogleg å søke begge stader. Sjå her for meir informasjon.
Sjå retningslinjer for tilskotsordninga her.
Informasjonsmøte
Kulturrådet arrangerer informasjonsmøte om den nye tilskotsordninga tysdag 25. februar kl. 10.00.
Utlysing om kunst og kunstig intelligens i juni 2026
Sjølv om Kulturrådet no etablerer ei eiga tilskotsordning for forsking, vil forskingsutvalet halde fram med å lyse ut tematiske forskingsprogram. Den første utlysinga kjem i juni 2025. Tema for utlysinga blir kunst og kunstig intelligens.
Kulturbruk
Hausten 2024 lysa Kulturrådet ut eit større forskingsprogram knytt til kulturbruk. Målet med Kulturbruk, publikum og deltaking er å gje auka kunnskap om den kulturelle åtferda til befolkninga, ei djupare forståing av ulike samfunnsgrupper sine kunst- og kulturopplevingar, og ein betre innsikt i kulturbrukaren si rolle i kultur- og samfunnsliv. Særleg ønskjer Kulturrådet å auke kunnskapen om dei gruppene som tilsynelatande ikkje er aktive kulturbrukarar. Søknadsfristen er 17. februar 2025. Søknadane vert behandla i eit møte i forskingsutvalet 18. mars.