Fleire gjekk på konsert og framsyning i 2024

– Det er gledeleg at fleire finn vegen til konsertar og framsyningar over heile landet. Auka publikumsinntekter viser at folk set pris på kulturtilbodet, seier Torbjørn Urfjell, avdelingsdirektør for samfunn og arena i Kulturdirektoratet.

Kulturdirektoratet publiserer kvart år statistikk over besøkstal, aktivitet og økonomi for musikk- og scenekunstinstitusjonar med offentleg støtte, inkludert musikkfestivalar som får over ein million kroner i tilskot frå Kulturrådet.

Fleire med billett

Auken i publikum kjem først og fremst av at fleire kjøper billett. Rundt 2,1 millionar publikummarar var betalande, det vil seie 58 prosent av alle besøkjande. Resten var med på gratisarrangement eller hadde fribillettar. På festivalar var andelen gratispublikum høgare (58 prosent) enn hos andre institusjonar (26 prosent).

Totalt besøkte omtrent 102 228 fleire ein konsert eller framsyning i 2024 enn i 2023. Publikumstala har auka jamt sidan pandemien i 2020.

Stabilt aktivitetsnivå, men færre tilbod til barn og unge

Det vart arrangert 19 300 konsertar og framsyningar i 2024, omtrent like mange som året før. Festivalane auka med 10 prosent til om lag 2 900 arrangement, medan teater, opera, orkester og dans hadde ein liten nedgang.

Framsyningar for barn og unge gjekk ned med 3 prosent frå 2023 til 2024. Tilbodet til barn og unge utgjer ein tredel av alle arrangement.

Tydeleg oppgang i turnéverksemd

I 2024 vart det framført rundt 3 700 konsertar og framsyningar på turné i Noreg, ein auke på 29 prosent frå 2023. Det markerer ein tydeleg oppgang etter fleire år med lågt turnénivå.

Pensjonskostnader gir store utslag i økonomien

Årsresultata for 2024 er vesentleg betra sidan 2023, både for teater, orkester, operaselskap og festivalar. Teatera, orkestera og operaselskapa hadde eit samla positivt årsresultat på 130 millionar kroner, ei markant endring frå eit negativt årsresultat på 35 millionar kroner i 2023. Endringa kjem først og fremst av nye berekningar av framtidige pensjonskostnader, og seier lite om kor godt verksemdene blir styrte økonomisk.

Vekst i inntekter

I 2024 var dei samla eigeninntektene på omtrent 1,1 millionar kroner, ein auke på rundt 7 prosent frå 2023. Over halvparten av inntektene kom frå billettsal, som har auka med rundt 7 prosent. Dette kjem både av at det vart selt fleire billettar, og av at gjennomsnittsprisen auka frå 293 til 304 kroner.

Inntekter frå offentlege tilskot har auka med rundt 197 millionar kroner (5 prosent), noko som er høgare enn prisveksten i same periode.

Hos festivalane kjem omtrent 50 prosent av dei samla inntektene frå eigeninntekter, medan eigeninntektene for teater, orkester og operaselskap er rundt 19 prosent.

Vil du sjå nærare på tala?

På lenkja under finn du heile musikk- og scenekunststatistikken. Du kan velje kva grupper eller enkeltaktørar du vil sjå tal for.

Musikk- og scenekunststatistikk 2024

Kulturdirektoratet har forvaltningsansvar for mange institusjonar og verksemder som får statstilskot over kapittel 320 og 323 på statsbudsjettet. Dette omfattar mange av musikk- og scenekunstinstitusjonane, og dessutan litteraturhus, kunsthallar og mange kultur- og medlemsorganisasjonar. På lenkjene under kan du sjå nærare på tala for desse verksemdene. 

Tal  frå institusjonar og verksemder med statstilskot over kap. 320, post 74 og 75

Tal frå institusjonar og verksemder med statstilskot over kap. 323, post 70