To hundre skulebibliotek inkluderte i innkjøpsordningane

509 skulebibliotek søkte om å få komma inn på forsøksordninga, og dei to hundre utvalde skulebiblioteka er spreidde over heile landet. Oslo, Akershus, Rogaland og Trøndelag står med flest positive vedtak, men talet på tildelingar reflekterer i stor grad søknadsmengda frå dei ulike fylka. Også biblioteket til Den norske skulen i Brüssel er å finna blant tildelingane.

– Biblioteka sitt behov for bøker og entusiasmen til dei biblioteksansvarlege rundt forsøket har vore overveldande, seier rådsmedlem Anne Oterholm, som også leier Kulturrådets faglege utval for litteratur. – Samtidig har det vore utfordrande å fordele bøkene når det er så tydeleg at så mange søkjarar har behov for dei.

I vurderingane har Kulturrådet mellom anna lagt vekt på kva ressursar skulebiblioteka har og korleis biblioteka blir brukte i dag. Nokon av dei viktigaste spørsmåla har vore om skulen har ein skulebibliotekar eller annan dedikert ressursperson, om biblioteket blir brukt aktivt av klassane, om det finst ein plan for å nå fram til elevane med breidda i dei tilgjengelege bøkene, og om biblioteket er lett tilgjengeleg i skulebygningen.

Forsøksordninga er treårig, og dei to hundre skulebiblioteka vil no få tilsendt ca 120 titlar retta mot born og unge kvart år frå innkjøpsordningane for skjønnlitteratur, sakprosa og teikneseriar.

– Det har vore veldig lærerikt å få eit overblikk gjennom søknadene over mykje av det som skjer på dei ulike skulebiblioteka, seier Oterholm. – Og det kjem utvilsamt til å bli interessant å følgja opp denne ordninga når rapportane byrjar å komme inn.